O Tenis de Mesa Monteporreiro retomou a competición este venres coa xornada 16 da Superdivisión Masculina.
O equipo pontevedrés viaxou até Xirona para medirse ao penúltimo clasificado, o C.T.T C.E.R L´Escala, nun partido que culminou co resultado de 1-4 para os visitantes.
A pesar do avultado do resultado, a realidade é que as cousas non empezaron ben para o conxunto lerezano. Martín Betancor non puido vencer no primeiro partido e caeu por 3-1 fronte a Rafael Vinicius.
Foi quenda entón para Miguel Ángel, que esta vez si puido inaugurar o marcador do TM Monteporreiro para pór o 1-1 no global tras gañar a Xavier Peral.
Nicolas Galvano mantivo a liña ascendente do equipo tras imporse a Iker González e Miguel Ángel repetiu vitoria contra Rafael Vinicius.
Estes resultados desnivelaron a balanza en favor dos intereses do conxunto pontevedrés cun 1-3 no global.
Ás boas sensacións sumouse a redención de Martín Betancor, que se refixo da derrota inicial cunha vitoria fronte a Iker González que serviu para pór o definitivo 1-4 no marcador.
Con esta vitoria, o Tenis de Mesa Monteporreiro mantense sexto con 17 puntos, dous menos que o quinto clasificado Irún Leka Enea. Ademais, o equipo pontevedrés disputará este martes o seu partido correspondente á xornada 15 fronte ao Enoli Lles Borges Vall, sétimo clasificado e perseguidor inmediato dos lerezanos na clasificación.