O pavillón de deportes de Caballedo pasará a denominarse Xosé Luís Bouzas Ambroa 'O Rubio'.
Así o aprobou o pleno municipal de Cerdedo-Cotobade, apoiando por unanimidade unha proposta presentada polo BNG da localidade.
Recoñécese así o legado dun veciño que traballou polo deporte local e especialmente polo deporte feminino.
O Rubio tivo un papel decisivo na década dos 90 na posta en marcha do primeiro club de fútbol sala feminino da localidade, o Deportivo Loureiro FS.
Ademais formou parte da fundación do 'Forno de barro', que despois pasou a chamarse Tenorio Fútbol-Sala Feminino.
"É digno merecedor de ser lembrado como un referente veciñal que traballou arreo polo desenvolvemento social e deportivo de Cerdedo-Cotobade", explicou na súa moción o portavoz do BNG, Ernesto Filgueira.
A moción aprobada polo pleno da corporación inclúe tamén a organización dunhas xornadas divulgativas sobre o traballo e legado que O Rubio deixou no deporte de Cerdedo-Cotobade.