"Hai que facer unha valoración positiva polo contexto, o momento e a situación desta semana". Así comezou a rolda de prensa do adestrador do Pontevedra CF, Yago Iglesias, despois de golear ao Compostela por 4-1.
Indicou que o quedar eliminados da Copa do Rei foi un mal menor, pero o que si afectou o equipo foi a acumulación dos partidos e o triunfo do Numancia deste fin de semana, "que nos obrigaba a gañar si ou si si queriamos chegar a ese partido con vantaxe".
Pero o Compos non llo puxo nada difícil a un equipo granate que, a pesar de estar infestado de baixas de longa duración, está a saber adaptarse a cada momento e a cada rival para manter a súa esencia e seguir facendo gozar á súa afección.
Neste sentido, o técnico explicou que semana a semana buscan variantes a nivel colectivo e individual e resaltou "o nivel espectacular" de Rares durante todo o encontro e cre que é "un proxecto de seis moi interesante".
Ademais do xogo despregado polo centrocampista, Iglesias destacou a asistencia do recentemente chegado Brais Abelenda e que tanto Rufo como Charly, os dous dianteiros, reencontrásense co gol.
Este último "ten importancia capital" para o adestrador, quen sinalou que o tanto chegou cando o Compos estaba a defender mellor "e deunos tranquilidade para saber que sempre que nos pomos por diante somos un equipo que domina máis, si cabe, os partidos".
Agora, o Pontevedra debe centrarse en descansar e recuperar efectivos de cara ao enfrontamento transcendental da próxima xornada fronte a un Numancia "que está nun estado de forma espectacular" e que lle pisa os talóns na clasificación.
"Queremos prepararnos ben, será a xornada tres da segunda volta, aínda quedan 15 partidos, pero imos competir para conseguir o tres puntos", indicou Iglesias.