O deporte centrou este domingo a campaña do PSdeG-PSOE para o 25 de setembro en Pontevedra. Cargos e militantes socialistas realizaron un reparto de propaganda electoral encabezados pola número 2 da candidatura por Pontevedra, Patricia Vilán, e insistiron en que o resumo da xestión do presidente en funcións, Alberto Núñez Feijóo, e do PP nesta materia pódese sintetizar en "unha absoluta falta de planificación e unha ausencia de inversións".
Vilán criticou que en dúas lexislaturas nin sequera se elaborou un Mapa Autonómico de Infraestructuras Deportivas, porque a intención do PP sempre é utilizar as obras deportivas "como moeda para comprar vontades". Ela aposta por rachar con esta situación, pero insiste en que "non o fará mentras o PP siga no poder".
Fronte á forma de facer política que lle critica ao PP, Vilán indica que os socialistas entenden o deporte como un elemento fundamental para a mellora da calidade de vida dos cidadáns e ve necesario elaborar un Plan Integral do Deporte Galego que defina os obxectivos e estableza as estratexias correspondentes a curto, medio e longo prazo, para o desenvolvemento do deporte galego en todas as súas manifestacións.
Ao respecto, prometeu que os aocialistas traballarán para establecer mecanismos de coordinación, cooperación e colaboración da Xunta de Galicia cos concellos e, no seu caso, co sector privado, co fin de mellorar a xestión pública do deporte. Respecto disto, indicou que o traballo que se ten feito en Pontevedra debe ser un referente de como o deporte pode servir para inculcar habitos saudabeis e pode xerar actividade económica.
No seu programa préstanlle especial atención ao deporte feminino e para as persoas con discapacidade, pois "aínda hai moito que avanzar en ambos os dous ámbitos".
Engade Pontevedra Viva como fonte preferida de Google de balde
Mantente informado coas últimas noticias de actualidade.