O Parque Empresarial do Campiño dá un paso decisivo cara á súa expansión. A Xunta de Galicia e o Concello de Pontevedra avanzan conxuntamente na tramitación do Plan Estruturante de Ordenación do Solo Empresarial (Peose), un instrumento que permitirá aumentar en 160.044 metros cadrados a superficie do parque, case a metade da extensión actual (412.331 m²).
A actuación, promovida pola sociedade pública Xestión do Solo de Galicia (Xestur), suporá un incremento do 46 % respecto do espazo actual e un investimento estimado de 11,6 millóns de euros.
O obxectivo é claro: ampliar a capacidade de acollida empresarial nunha área que xa ten todas as súas 86 parcelas ocupadas e dar resposta á demanda crecente de solo industrial na comarca.
Coordinación entre administracións
A planificación desta ampliación require abordar cuestións técnicas fundamentais.
Por iso, a directora xeral de Estratexia Industrial e Solo Empresarial, Margarita Ardao, mantivo unha reunión o pasado mes de xullo co concelleiro de Urbanismo de Pontevedra, Alberto Oubiña, para consensuar solucións en materia de saneamento e dotación de recursos hídricos que aseguren o correcto funcionamento do parque unha vez executada a ampliación.
Durante o proceso de redacción do Peose detectáronse afeccións sectoriais que obrigaron a adaptar o deseño inicial do proxecto, co fin de garantir a súa viabilidade ambiental e territorial. A coordinación entre Xunta e Concello é esencial para superar esta fase e avanzar na tramitación.
Tramitación ambiental e previsión de aprobación
O Peose do Campiño someterase nas próximas semanas á avaliación ambiental estratéxica, un procedemento clave que permitirá emitir o informe preceptivo no prazo aproximado de tres meses.
Unha vez completado este paso, a Xunta prevé aprobar inicialmente o plan no primeiro trimestre de 2026, co que se iniciará a fase administrativa previa á urbanización do novo solo empresarial.
Esta ampliación encaixa dentro da estratexia autonómica de reforzo do tecido industrial galego, centrada en dotar as principais comarcas de espazos modernos, sostibles e ben conectados, que favorezan o asentamento de novas iniciativas empresariais e a creación de emprego estable.
Cando se complete a ampliación, o Parque Empresarial do Campiño converterase nun dos principais polos industriais do sur de Galicia, tanto pola súa localización estratéxica como pola súa capacidade para atraer novos investimentos.
A súa expansión permitirá crear novas oportunidades laborais e fortalecer o tecido empresarial local, nun contexto de crecemento sostido da demanda de espazos produtivos.
Aposta polo solo empresarial na provincia de Pontevedra
A ampliación do Campiño é unha das múltiples actuacións que a Xunta, a través da Sociedade Xestión do Solo de Galicia (Xestur), está levando a cabo para desenvolver arredor de 8,5 millóns de metros cadrados de solo empresarial en Galicia.
Esta estratexia de política industrial busca facilitar o asentamento de novas empresas e ampliar as que xa están na Comunidade.
O total das actuacións na provincia de Pontevedra permitirá poñer á disposición das empresas case tres millóns de metros cadrados adicionais.
Entre os proxectos máis próximos á comarca de Pontevedra figuran: a reurbanización da Central de Transportes e Terminal Intermodal de Ponte Caldelas, con 86.964 m², lindante co propio parque do Campiño e o da Reigosa; o Parque Empresarial de Fragamoreira (Poio), que achegará 374.229 m² máis de solo industrial; e, actualmente en licitación, a redacción do Peose da ampliación do Polígono Industrial do Pousadoiro en Vilagarcía de Arousa, cunha previsión de expandir 212.254 m² de solo industrial.
Axudas para mellorar a competitividade e a calidade dos parques
A expansión dos parques empresariais compleméntase con dúas liñas de axudas autonómicas que buscan mellorar infraestruturas, servizos e seguridade nas áreas industriais galegas.
A primeira estivo dirixida á habilitación e mellora de infraestruturas dos parques empresariais de Galicia, cun orzamento final de 5,6 millóns de euros, despois da súa ampliación orzamentaria.
Esta convocatoria permitiu financiar 73 actuacións, das cales 16 corresponden á provincia de Pontevedra.
A segunda liña de axuda tivo como finalidade a mellora da seguridade, a competitividade e a obtención de certificacións, selos ou marcas de calidade nas áreas empresariais galegas.
Cun orzamento de máis dun millón de euros, beneficiou a cinco áreas empresariais pontevedresas e quince en toda Galicia.