O Concello de Soutomaior presentou a segunda edición do mercado de oportunidades e de segunda man, unha iniciativa que busca dinamizar o comercio local, promover a economía circular e crear un espazo de encontro para veciños e visitantes na antesala das festas.
O mercado, que combina a participación de establecementos locais, artesáns e particulares, pretende converterse nun escaparate onde amosar produtos de distintas tempadas, artigos de segunda man e creacións artesanais.
A intención é favorecer novas oportunidades de venda e, ao mesmo tempo, fomentar un ambiente de rúa no que a cidadanía poida gozar dunha xornada de lecer e descubrir a oferta comercial do municipio.
A iniciativa reforza a aposta por dar unha segunda vida a obxectos en bo estado e promovendo o consumo responsable e de proximidade.
O prazo para presentar solicitudes para participar está aberto ata o luns 1 de decembro.
As persoas interesadas deberán tramitar a inscrición a través da sede electrónica municipal.
O mercado celebrarase o 14 de decembro, data na que o Concello facilitará mesas para a exposición dos produtos.
Cada participante será responsable da súa propia xestión de vendas e deberá adaptarse á distribución e ao mobiliario disposto pola organización.
Na selección das solicitudes teranse en conta o espazo dispoñible e a adecuación dos produtos ao formato do mercado.
A súa filosofía aposta por prezos proporcionados e accesibles, en consonancia cun evento pensado para ofrecer oportunidades reais a compradores e vendedores.