As obras de saneamento nos lugares do Pazo, Carabelos, Eirós e Leirados xa están rematadas. Unhas 160 vivendas de Mourente poderán engancharse á rede nas próximas semanas, segundo avanzou o alcalde, Miguel Anxo Fernández Lores, que revisou este xoves os traballos realizados nos últimos meses.
O Concello xa está facendo toda a tramitación administrativa precisa para que poidan engancharse á rede de saneamento canto antes. Nas próximas semanas daráselles aviso.
As obras de saneamento realizadas incluíron a instalación de 5.000 metros lineais de tubaxes, ás que se sumou unha rede de recollida de augas pluviais de 852 metros lineais, no tramo da estrada Pontevedra- Ourense, comprendido entre os quilómetros 88 e 90.
Trátase da instalación de tubos de 400 milímetros cos seus correspondentes pozos de rexistro e sumidoiros.
A rede de saneamento de Mourente é a última obra do convenio de colaboración asinado no seu día con Fomento.
Rematada a instalación do saneamento queda pendente a construción das beirarrúas e as medidas de seguridade viaria comprometidas.