José Luis Filgueira, un empresario de Sanxenxo, realizou un pedido que permitirá que 20.000 novas máscaras se poidan repartir no municipio. Este martes chegaba a primeira remesa con 3.000 unidades ás oficinas de Servinauta. O material xa comezou a repartirse entre o persoal de diversos departamentos municipais como Policía Local, Nauta e o servizo de Emerxencias.
O empresario sinala, segundo o goberno local, que é un "granito de area". Esta proposta conta co colaborador Juan Chaparro, directivo dunha multinacional do sector téxtil e veciño de Sanxenxo que decidiu poñerse en contacto cos provedores das máscaras para distribuílas.
O primeiro pedido fixérono a Turquía e paralizáronllo. Este segundo procede de China en paquetes de 400 unidades e o máis complicado para este traslado atópase na loxística e nos permisos para pasar as aduanas.
A diario reciben nas oficinas entre seis e sete paquetes. José Luis Filgueira afirma que estuda realizar novos pedidos se resultan necesarios e tamén recadar fondos para novas adquisicións porque, unha vez superado o estado de alarma, entende que as condicións de seguridade e hixiene para evitar contagios serán decisivas.
Outra empresa, Myagal, a cargo de Guillermo Senra, colaborou tamén achegando 60 litros de xel hidroalcohólico e mil pares de luvas, que se repartirán tamén entre persoal dos servizos municipais.
Telmo Martín, alcalde de Sanxenxo, destaca estas colaboracións porque "demostran o compromiso da sociedade civil nunha situación difícil".