A Xunta de Goberno do Concello de Pontevedra aprobou este luns a contratación dunha serie de traballos de conservación e mantemento de vías do rural pontevedrés por un importe de 726.000 euros.
O voceiro do executivo local, Raimundo González, informou que é unha adxudicación para os próximos catro anos.
"Serán obras maioritariamente urbanas pero tamén hai no rural", explicou González Carballo, e permitirán "prolongar a vida útil das vías públicas".
Os viais necesitan unha atención permanente e sistemática, ademais do seu uso permanente a climatoloxía provoca constantes deterioracións polo que se fai preciso acometer pequenas actuacións que, en si mesmas non teñen a entidade suficiente para abordalas como proxectos concretos.
Trátase de reparacións de arquetas, muros, acumulacións de augas pluviais, fochas ou pavimento en mal estado.