Este xoves 31 conmemórase o Día Mundial sen Tabaco e a área sanitaria de Pontevedra e O Salnés súmase aos actos que se celebran internacionalmente coa instalación de mesas informativas nos hospitais Montecelo, Provincial e O Salnés para fomentar os hábitos saudables e estimular ao abandono do vicio de fumar.
O servizo de Pneumoloxía do Complexo Hospitalario Universitario de Pontevedra dispón dunha Unidade de Tabaquismo integrada pola pneumóloga Guadalupe González, unha profesional con formación específica nesta disciplina, e por unha enfermeira que atende semanalmente catro novos casos e 12 revisións. Desta forma aténdense ao redor de 750 pacientes ao ano.
Durante a consulta execútase a determinación de monóxido de carbono en aire expirado do paciente mediante a técnica Cooximetría, na que se detecta a perda na capacidade de osixenación da hemoglobina. Na consulta tamén se realiza a terapia cognitivo-conductual e se prescribe o tratamento médico, habitualmente terapias substitutivas con nicotina como parches, chicles e pastillas de nicotina, vareniclina e bupropion.
Os estudos mostran que un 50% de fumadores falecen prematuramente e teñen unha esperanza de vida de ao redor de 14 anos menos que a media.
Os pneumólogos do Complexo Hospitalario aconsellan fixar unha data de para deixar de fumar e establecer como meta levantarse cada día co obxectivo de non fumar durante toda a xornada.