A Asociación de Nais e Pais (ANPA) do Colexio Froebel convocou á comunidade escolar a unha reunión o próximo 26 de maio para analizar a situación na que se encontra o centro e decidir se inician medidas de presión para demandar que se acometan as obras de mellora das instalacións.
Sinalan que a Fase C das obras están en suspenso "sine die", segundo lles explicou o Xefe Territorial de Educación, César Pérez, ao director e a representantes da ANPA nunha reunión celebrada en abril. Dende a comunidade escolar denuncian que o tellado que cobre o patio do centro se encontra cheo de parches que, cando rompen, permite que a auga coe e inunde o recinto no que o alumnado fai Educación Física e vai ao recreo.
O falso teito do patio está, segundo expoñen, nun estado malo xa que é de cortiza e unha vez se molla vaise podrecendo pouco a pouco. Esa cuberta ten buratos por onde se mete a auga cara ao patio, sinalan os pais dos alumnos que engaden que nalgunhas aulas o falso teito é de fibra de vidro, material prohibido nos centros de educación pola súa perigosidade para a saúde. Ademais, a estrutura que suxeita o tellado desta zona tamén encóntrase embutida na pedra e a ANPA teme que exista o risco de que se poida producir algún desprendemento afectando aos alumnos.
Tamén afirman que as obras da Fase B realizadas en 2013 foron "unha chapuza". O que se fixo foi cambiar o tellado e pouco máis, xa que non se cambiaron as ventás a pesar de que as situadas nas aulas de infantil non pechan ben. Indican que no túnel de infantil xa volve caer auga cada vez que chove e non se cambiaron os andeis e armarios que se viran afectados.
Esta situación parte do ano 2010 cando caeu un lenzo de 12 metros de longo dun corredor do segundo andar do centro que obrigaron a que se acometesen obras de urxencia a teor do podres que se encontraban as cerchas que sustentaban os tellados.