A Brigada Galicia VII, Brilat, acaba de asumir o mando da misión pola que España forma a militares ucraínos antes de regresar ao seu país e entrar en combate.
As Forzas Armadas desenvolven actividades de formación de persoal ucraíno en territorio nacional a través da Unidade de Formación de Combate da Misión Militar da Unión Europea de Apoio a Ucraína (EUMAM UA) e, desde o pasado 24 de maio, a Brilat é a responsable da misión. Lideraraa seis meses.
Para cumprir esta misión, creouse o Toledo Training Coordination Center (TTCC), co que se desenvolve un programa de adestramento dedicado a adestrar rotacións de militares ucraínos, para que poidan poñer en práctica os coñecementos adquiridos ao regresar ao seu país.
O 24 de maio, asumiu o mando cun acto de Transferencia de Autoridade (TOA) na Praza de Armas da Academia de Infantería de Toledo. Con este acto, culmina o proceso de substitución entre a Unidade de Formación de Combate (UFC) do continxente EUMAM UA III e o EUMAM UA IV, o aque asume a Brigada.
A nova unidade está constituída sobre a base do persoal do Grupo de Cabalería Lixeiro Acoirazado Santiago I do Rexemento de Cabalería Farnesio 12, con sede en Valladolid. Á fronte estará o tenente coronel Roberto Moreno Sánchez del Águila.