O buque escola da Armada Española, o Juan Sebastián de Elcano, atracará o vindeiro domingo 12 de abril en Marín. O evento é xa ben coñecido na localidade, pero este ano será moi diferente, pois cada ano, coa súa chegada, organízase un gran acto público no que as familias e amigos dos cadetes que terminan o seu Cruceiro de Instrución van recibilos e prodúcese unha gran sucesión de bicos, abrazos e mostras de agarimo, pero a pandemia do coronavirus non permitirá este ano que a imaxe se repita.
Nesta ocasión, o buque escola atracará no Peirao de Torpedos da Escola Naval Militar como fin o seu XCII Cruceiro de Instrución e as restricións do estado de alarma non permitirán nin que haxa unha recibida multitudinaria nin sequera que acudan os máis achegados a darlles o tan esperado abrazo de benvida.
Segundo deu a coñecer a Escola Naval, nesta ocasión, o buque será recibido unicamente polo comandante-director da Escola e non se celebrará ningún acto institucional nin xornadas de portas abertas.
O buque partirá ese mesmo día cara á súa base na baía de Cádiz.
Por outra banda, os alumnos, unha vez finalizado o cruceiro, continuarán cos seus estudos en liña, igual que o resto de alumnos da Escola Naval Militar.