Nauta Sanxenxo, Costas e Portos de Galicia reuníronse este venres dentro da comisión para a rexeneración da Carabuxeira, para analizar o último informe do Ministerio para a Transición Ecolóxica e o Reto Demográfico sobre a rexeneración deste areal e o de Lavapanos.
O redactor do proxecto, Fernando López Mera, será o encargado de ampliar a análise do estudo de alternativas, tal e como solicita o Ministerio para avanzar na solución definitiva para a rexeneración de ambos os areais.
Neste sentido cabe lembrar que Nauta Sanxenxo expón como solución, dentro das alternativas analizadas, a construción dun espigón de case 100 metros e unha anchura de 2,24 metros, formado por un núcleo de formigón forrado de granito.
Tras a colocación deste dique retiraríanse os tubos geotextiles da praia colocados na fase provisional e tamén se repoñerían 27.000 metros cúbicos de area en ambas as praias.
O obxectivo do proxecto é achegar unha solución que acabe cos actuais problemas de perda de árido tanto en Lavapanos como na Carabuxeira.