A confraría de Arcade responde á agrupación de mariscadoras que esta semana se concentraban para denunciar a subida de cota e a imposibilidade de utilizar o barcoda confraría para chegar ata os bancos marisqueiros.
Segundo sinalan desde o pósito, durante os últimos anos debido á presenza de covid e a distintos cesamentos de actividade ao que se acollía a maioría do sector de marisqueo a pé, esta agrupación non realizou case ningunha venda e a confraría tivo que asumir o cargo de todos os gastos que se xeraron.
Sobre a débeda que a agrupación de mariscadoras rexeita, a Xunta Xeral da confraría indica que está apoiada polas correspondentes facturas como a do seguro do ano 2021 ou a renovación do fondo do barco, que foron afrontadas pola confraría de Arcade directamente.
Sinalan que se ofreceu aos representantes do marisqueo a pé todas as formas posibles de fraccionamento do pago dos gastos acumulados desde 2021 ata 2024. Entre estas propostas se recollía o pago de cinco euros ao mes por persoa. Pola contra, esta opción non chegou a alcanzarse acordo algún, explican desde a entidade.
Alegan que se mantiveron cinco reunións coa agrupación. Citan, en concreto, a celebrada o 21 de novembro de 2023 nas instalacións da Federación Provincial de Confrarías de Pescadores de Pontevedra coa presenza de integrantes da Consellería do Mar; da Federación de confrarías; da Xunta Xeral da Confraría; e representantes da agrupación de marisqueo a pé coa presidenta Rita Míguez á cabeza.
Nesa reunión chegábase ao acordo do pago de 14.081, 42 euros pertencentes a gastos do ano 2021 e á decisión de estudar o informe da débeda xerada polo sector marisqueiro durante os anos 2022 e 2023.
A confraría afirma que segue sen recibir "ningún tipo de ingreso" deste sector relacionado coa débeda pendente, vendas ou cotas de socios durante este ano.
Ante esta situación, entenden que a agrupación de marisqueo a pé non respectou os acordos aprobados en Xunta Xeral, da que forman parte, e consideran que o colectivo desacredita publicamente ás persoas que foron elixidas legalmente como representantes da confraría.
Por outra banda, a Xunta Xeral debido á situación financeira na que permanece a confraría, para evitar o seu peche, propuxo que as persoas asociadas asumisen os gastos comúns, entre cada un dos socios, na mesma contía e de forma equitativa. Rexeitan que se pase de pagar 50 euros ao ano a 660 euros como denunciaba Rita Míguez, presidenta das mariscadoras.
Aclaran, ademais, que o patrón maior Gonzalo Reinoso non é quen adopta decisións nin quen decide como se utilizan os recursos da confraría, senón a Xunta Xeral, que actúa "de maneira democrática".
GASTO DO ARRANXO DO BARCO
Explican tamén que o barco que reclaman as mariscadoras non se atopa preparado para saír ao mar e sinalan que debe ser a agrupación de marisqueo a pé quen soporte os gastos desta embarcación.
Sinalan quea confraría de Arcade "carece de recursos suficientes para atender esta continxencia, o que dá lugar a verse obrigado a ter amarrada a embarcación".
A Xunta Xeral demanda a implicación da agrupación de mariscadoras para o arranxo do barco ao entender que é a principal interesada en resolver esta situación.