Un total de seis residencias de maiores da área sanitaria de Pontevedra e O Salnés teñen este domingo casos activos de covid-19. Segundo figura no último balance oficial da Consellería de Sanidade, na que máis medrou a incidencia nas últimas 24 horas foi na Soremay de Pontevedra.
Así, na última actualización de datos, esta residencia pontevedresa sumou 15 novos positivos, 12 usuarios e 3 traballadores, que elevan a un total de 20 os afectados polo brote neste centro. O global dos contaxiados son 14 persoas maiores e 6 traballadores.
Nas últimas 24 horas, na área sanitaria tan só se rexistraron estes 15 novos positivos en Pontevedra e contabilizáronse tres altas a pacientes, en concreto, a tres traballadores da residencia DomusVI de Ribadumia.
Neste centro de Ribadumia hai nestes momentos 35 casos activos de covid-19, 21 usuarios e 14 traballadores.
A residencia Pontevedra de Vilaboa é a que rexistra máis número de casos na área sanitaria, un total de 56, os mesmos que o sábado, dos que 42 son maiores e 14 traballadores.
Ademais, hai dous casos na residencia Nosa Señora Valvanera de Cambados (1 traballador e un usuario), dous traballadores na residencia Nuestra Señora de los Dolores de Forcarei e dous usuarios contaxiados na residencia Divina Pastora de Vilagarcía de Arousa.
En toda Galicia, o total de afectados en residencias de maiores son 634, 431 maiores e 204 traballadores.