A Deputación de Pontevedra implementa novas medidas de apoio aos emprendedores que están a iniciar a súa actividade nos viveiros de Barro e Lalín. Actualmente son 32 os espazos ocupados entre naves e oficinas por estas prometedores entidades. Para facilitar a súa supervivencia nesta época de paralización da economía, o executivo provincial ofreceulles ás 28 firmas o aprazamento do aluguer dos espazos que ocupan.
Ata o 20 de maio teñen de marxe para abonar a cota do primeiro trimestre de arrendamento que inicialmente estaba fixado para o 5 de abril. Así mesmo, quedan liberadas do pago proporcional ao tempo que levan sen actividade.
Despois de contactar cos dirixentes destas empresas, 18 delas están paradas e 12 optaron por acollerse ás dúas medidas propostas pola Deputación. As seis restantes acolleranse á exoneración do pago daqueles días de inactividade pero abonaron a súa cota no tempo preestablecido.
As outras dez empresas manteñen o seu ritmo de traballo con normalidade ao tratarse de servizos esenciais ou porque adoptaron sistemas de teletraballo e todas elas fixeron efectivo o pago do seu aluguer.