As organizacións sindicais CIG, CC.OO., STEG e CSIF, que forman o comité de folga que desenvolveu a convocatoria do 10 de setembro e que tiñan prevista unha nova protesta o 16 de setembro, decidiron cambiar de data o segundo día da convocatoria e aprazala unha semana.
Desta forma, as catro organizacións sindicais debido ao cambio de data do inicio de curso en secundaria e resto de ensinos decidido pola Consellería de Educación que xestiona Román Rodríguez tomaban a decisión nas últimas horas de convocar a folga educativa o mércores 23 de setembro.
Os convocantes fan un chamamento ao profesorado de educación secundaria, bacharelato, formación profesional, os ensinos de artes plásticas e deseño, ademais das deportivas e todos aqueles ensinos de réxime especial para que se somen ao paro e reclamen a contratación de máis profesionais educativos e unha baixada na porcentaxe de número de estudantes por aula, entre outras medidas.