O alcalde de Pontevedra, Miguel Anxo Fernández Lores, lamenta as críticas efectuadas polo portavoz do Partido Popular, Jacobo Moreira, ao novo plan de tratamento do lixo que está a desenvolver o goberno local.
Lores realizou un paralelismo coas críticas que sufriu a peonalización cando se comezou a aplicar no centro histórico e o Partido Popular presentou un recurso que nunca retirou. Da mesma forma, o rexedor entende que Pontevedra tiña unha materia pendente en relación coa recollida das basuras: "Eramos un concello do montón" apuntou Fernández Lores ao referirse a que se está xestionando os residuos enviándoos a Sogama e queimándoos con custos elevadísimos tanto sociais como económicos ascendendo a dous millóns de euros ao ano.
Neste sentido, o alcalde pontevedrés sinalou que igual que co modelo urbano, están a observar o que se fai no mundo para reducir custos e aproveitar o máximo dos lixos. "O lixo é de todos", indicou o dirixente nacionalista sinalando que os residuos se producen en cada domicilio e é responsabilidade de quen os produce. Por ese motivo, apuntou que o goberno local está a buscar o sistema máis barato posible e medioambientalmente razoable.
Desta forma, considera que non é correcto que se poñan tachas antes de empezar cando se está desenvolvendo este proceso polas pautas que marca a lexislación, que obriga a recuperar o 50% da materia orgánica. Engadiu que non lle entra na cabeza como alguén se pode opoñer a mellorar as cousas e acusou aos populares de "facer brincadeiras dunha cousa que é seria".
Lores apuntou, ademais, que mentres non se constrúa a planta da Canicouva os residuos dos composteiros comunitarios poderíanse trasladar a algunha das tres plantas de reciclaxe privadas que se atopan na provincia.