A Policía Nacional descartou que a avaría do novo equipamento de resonancia magnética do Hospital Montecelo sexa o resultado dunha sabotaxe.
Segundo informaron fontes oficiais da Comisaría Provincial de Pontevedra, tras recibir unha denuncia por parte da Área Sanitaria os axentes iniciaron unha investigación para esclarecer a causa dos danos sufridos polo novo equipo de tomografía axial computerizada (TAC).
A súa conclusión descarta que a máquina fose saboteada e atribúe a avaría a un cúmulo de erros por mala manipulación, tal e como sostiña a empresa que forneceu o TAC.
Segundo explicaron fontes sanitarias, estes equipos de resonancia magnética requiren duns 1.500 litros de helio para refrixerar os imáns superconductores durante a proba diagnóstica. O caso é que alguén deixou sen helio á máquina accionando uns dispositivos de seguridade e estragando todo o equipo.
A Xunta destinara un investimento de 2,2 millóns de euros, financiada con fondos Next Generation da Unión Europea, para poder adquirir tres novos TAC de gamas superiores para o Complexo Hospitalario Universitario de Pontevedra. Este novo aparello tiña que comezar a funcionar a mediados de xaneiro.
Desde a Xerencia da área Sanitaria confirmaron que unha vez que tiveron coñecemento dos feitos cursouse a pertinente denuncia na Policía Nacional "e nestes momentos estase á espera da resolución do xuíz, unha vez finalizadas as investigacións policiais sobre este caso".
Tamén informa a Xerencia que a resonancia magnética de Montecelo xa está reparada.