A residencia de maiores Pontevedra, situada en Vilaboa, sumou nas últimas 24 horas un total de 26 novos positivos de covid-19, unha cifra que eleva a 40 o total de casos activos vencellados a estas instalacións.
Segundo o último balance realizado polo Servizo Galego de Saúde, na última xornada detectáronse positivos en 19 usuarios e 7 traballadores desta residencia.
Sumados aos contaxios xa confirmados nos últimos días, neste momento hai esta residencia 29 usuarios e 11 traballadores coa infección por covid-19 activa.
O último balance tamén constata que se lles deu a alta médica a tres traballadores da residencia DomusVI Ribadumia. Nesta residencia, que na actualidade está intervida pola Xunta de Galicia, hai 59 casos activos, dos que 17 son traballadores e 42 usuarios.
O cómputo total na área sanitaria é, a maiores dos 40 casos de Vilaboa e os 59 de Ribadumia, tres casos na residencia Divina Pastora de Vilagarcía (dous usuarios e un traballador), tres na Nosa Señora Divina Valvanera de Cambados (un usuario e dous traballadores), 2 traballadores en Nuestra Señora de Los Dolores de Forcarei, un traballador na residencia Saraiva Sénior de Pontevedra e un traballador en Soremay de Pontevedra.