As protestas do sector do transporte polo elevado prezo do combustible tamén se fan extensivas a outro sector, o da frota pesqueira. Os barcos decidiron que amarrarán en todo o país ata o vindeiro mércores 23 de marzo, unha decisión que afectará a todos os portos das comarcas de Pontevedra, O Salnés e O Morrazo.
A decisión adoptárona o Comité Executivo e a Comisión Permanente da Federación Nacional de Confrarías de Pescadores, "de forma urxente e extraordinaria", pola " gravísima situación" que atravesa o sector pesqueiro derivado do aumento do prezo do combustible.
Acordouse na noite do venres e a frota seguirá amarrada ata a reunión que se manterá co ministro de Agricultura, Pesca e Alimentación, Luís Planas, o vindeiro mércores día 23 de marzo ás 17:00 horas.
Segundo datos oficiais da Federación de Confrarías, o paro afecta a unhas 200 confrarías e 40.000 afiliados, case 9.000 deles son propietarios de embarcacións.
O patrón maior de Burela e presidente da Federación Nacional de Confrarías, Basilio Otero, Basilio Otero lamentou que a frota pesqueira de España está a pasar un momento " gravísimo", por iso decidimos amarrar os nosos barcos en todo o país, ata que a reunión co ministro xa que "a sustentabilidade do sector pesqueiro agora mesmo está nas súas mans”.
O sector advirte que "ou temos propostas firmes, contundentes ou inmediatas ou o sector pesqueiro vaise a pique".