Telmo Martín, alcalde de Sanxenxo, achegábase á Praza de Vilalonga este domingo 12 con representantes de EC Casas, a empresa adxudicataria da reforma integral deste espazo. Tamén acudía Irene Campo, redactora do proxecto.
O rexedor anunciaba que o inicio das obras para humanizar o tramo da Avenida de Vilar, que coincide co tramo frontal da praza. O Concello busca crear un espazo de convivencia, ofrecendo unha plataforma única e ampliando os dous lados da beirarrúa, xa que se trata da arteria de entrada de vehículos á parroquia.
O límite de velocidade establecerase en 20 quilómetros por hora, co obxectivo de priorizar ao peón fronte aos vehículos. Para poñer en marcha estes obxectivos, elevarase o nivel das beirarrúas, que terán un ancho de tres metros. Ademais estableceranse tres pasos de peóns, que faciliten a interacción entre o centro urbano e a praza reformada.
O levantamento das beirarrúas está previsto para esta próxima semana, ao mesmo tempo que continuarán as obras no interior da praza onde se constrúe a bancada de pedra. Espérase que nos próximos días tamén se inicie a pavimentación.
A praza contará con 5.280 metros cadrados, véndose ampliada en máis de mil metros cadrados e gañando terreo nas proximidades ao campo de fútbol e á estrada PO-550. Eliminarase a bancada perimetral e as barreiras físicas actuais, segundo informa o goberno local.
O proxecto contempla a construción dunha pérgola de estrutura de aceiro galvanizado, con piares que seguirán a liña dos troncos de bidueiro. O Concello ten previsto destinar este espazo a actividades culturais e deportivas, coa posibilidade de que haxa unha zona de sombra durante o verán.