Catro foron as empresas que presentaron as súas ofertas para xestionar o servizo de salvamento, socorrismo e primeiros auxilios nas praias de Sanxenxo, que licitou o goberno municipal por primeira vez de cara o próximo verán.
As propostas de Brocoli SL, Esproade SL-Rescue SL, Offshore Special Services SL e Salvar, Formar y Socorrer SL, foron admitidas e serán valoradas nos próximos días.
Este servizo saíu a concurso a través da entidade Turismo de Sanxenxo por un custo de 624.525 euros, cifra á que segundo sinala o Concello deberáselle descontar o IVE de 108.388 euros, ao licitarse a través desta empresa municipal.
A adxudicataria do servizo deberá achegar, como reforzo do material que xa se empregaba ata o de agora, un todoterreo 4x4 e unha motocicleta para os desprazamentos.
O contrato ademais do persoal inclúe o material sanitario necesario, a vestimenta e o combustible para toda a frota de vehículos.
O servizo de socorrismo comezará desde o 15 de xuño ao 15 de setembro, en horario de 12 a 20 horas, nas praias de Areas, Silgar, Canelas e Montalvo.
Desde o 1 de xullo ao 31 de agosto, en horario de 12 a 20 horas, activarase nas praias Area de Agra, Panadeira, Baltar, Caneliñas, Paxariñas, Bascuas, Pragueira, Major, Foxos, A Nosa Señora da Lanzada, Areas Gordas, A Lapa e Espiñeiro-A Lanzada.