Ata oitenta persoas, entre socorristas e persoal de primeiros auxilios, integrarán este verán o servizo de salvamento que vixiará as praias de Sanxenxo.
O servizo estará xestionado pola empresa Salvar, Formar y Socorrer que, por un prezo de 1.257.855,50 euros (IVE incluído), logrou esta adxudicación por dous anos. Ademais, o contrato contempla a posibilidade de prorrogalo dous anos máis.
Haberá un responsable xeral, dous coordinadores e un operador de comunicacións á fronte e as condicións laborais de todo o persoal axustarase ao convenio colectivo vixente.
A memoria presentada pola empresa detalla a planificación ante distintas emerxencias, incluíndo as distancias lineais entre os accesos das 17 praias de bandeira azul, así como a posibilidade de establecer accesos prioritarios e secundarios.
Tamén explican con claridade a codificación das emerxencias, segundo a súa gravidade, logrando a maior puntuación do concurso público aberto por Turismo de Sanxenxo.
A empresa achegará material sanitario de primeiros auxilios, vestimenta completa e material de protección dos socorristas, un vehículo de intervención con desfibrilador, equipo de osixenoterapia e bala de osíxeno medicinal
Ademais, terán unha motocicleta e un todoterreo para os desprazamentos do servizo.
O servizo de socorrismo dará comezo o próximo 15 de xuño e prolongarase ata o 15 de setembro, en horario de 12 a 20 horas, nas praias de Areas, Silgar, Canelas e Montalvo, mentres que no resto de areais estará operativo do 1 de xullo ao 31 de agosto.