A XLV Festa do Viño de Barro xa empeza a quentar motores. O Concello xa ten en marcha os preparativos para unha nova edición do evento e, a través dun bando da Alcaldía, vén de anunciar o período de entrega dos viños caseiros para a posterior celebración das catas.
Esta festa conta cun certame da DO Rías Baixas e tamén cun concurso no que se escollen os mellores viños locais elaborados por colleiteiros e colleiteiras seguindo unha tradición secular.
Os viticultores locais que queiran participar poderán entregar nas dependencias municipais as súas elaboracións entre o 14 de maio e o 4 de xuño.
O 8 de xuño terá lugar a primeira das catas, cun panel de cata formado por persoas da localidade, no que se determinarán que viños pasan e cales non pasan á cata final.
Na cata final, un elenco de expertos en viticultura escollerá os mellores.
As distintas categorías que se valoran neste concurso son albariño, caíño, branco país, tinto país e elaboracións especiais.
Esta última é unha categoría que se creou nos últimos anos para dar cabida ás elaboracións de altísima calidade que se estaban facendo nas adegas particulares de Barro e ás que o concello quixo dar a coñecer.