O conselleiro de Cultura, Educación e Universidade, Román Rodríguez, e o alcalde de Caldas de Reis, Juan Manuel Rey, asinaron este martes o convenio de colaboración para acometer a ampliación do instituto IES Aquis Celenis.
A Xunta de Galicia investirá arredor de 3,5 millóns de euros nesta actuación, que, tal e como sinalou o conselleiro, ten por obxectivo dar resposta á crecente demanda de prazas neste centro.
Neste sentido, o titular do departamento educativo da Xunta de Galicia sinalou que esta obra vai supoñer unha importante mellora para comunidade educativa deste instituto, que contará con espazos renovados e máis amplos, axustados ás novas necesidades.
O instituto ten actualmente dúas aulas por cada curso de ESO e tres por cada curso de Bacharelato, que suman un total de 377 alumnos, o que obriga a ocupar todos os espazos dispoñibles, incluídos departamentos e salas de profesores. A ampliación prevé a construción dun andar a maiores no edificio existente, cunha superficie total construída de 2.372 metros cadrados.
O novo espazo estará dotado de aulas polivalentes para as dúas etapas, aulas de música e debuxo e zona maker. Así mesmo, haberá unha zona para o uso docente, aseos, ximnasio e vestiarios.
Tal e como explicou o conselleiro, unha vez asinado o convenio encargarase a redacción do proxecto, para o que os orzamentos deste 2022 xa recollen unha partida de 50.000 euros. Desta forma, as obras poderían iniciarse ao longo do ano 2023.
Pola súa banda, o Concello de Caldas de Reis comprométese a obter os terreos lindeiros ao instituto para a dotación dun aparcamento, a outorgar as licenzas de edificación necesarias e a reurbanizar as entradas e o aparcadoiro con acceso rodado ao instituto e ao Centro Público Integrado Alfonso VII. Así mesmo, colaborará coa Xunta na disposición dos espazos para reubicar ao alumnado durante a execución das obras, no caso de que sexa necesario.
CRÍTICAS DO BNG
Pola súa banda, o BNG denuncia que Xunta e Concello renuncian a implantar a FP no IES Aquis Celenis de Caldas. O voceiro nacionalista, Manuel Fariña dixo que "o alcalde e a Xunta terán que explicar por que lle negan a Formación Profesional ás mozas e mozos de Caldas"
Afirma o Bloque que a ampliación do IES Aquis Celenis non responde en absoluto ás demandas da comunidade educativa e da veciñanza caldense, pois non contempla en ningún caso a implantación dos Ciclos Formativos de FP que establezan novas opcións de futuro para os mozos da comarca.