Este xoves celebrouse unha reunión entre os representantes municipais de Poio e da consellería de Medio Ambiente, Territorio e Infraestruturas para avanzar na mellora da seguridade da PO-308.
Neste encontro, cualificado como "cordial e produtivo", asistiu o alcalde Luciano Sobral e o portavoz do grupo municipal do PP, Ángel Moldes, así como o xefe territorial de Medio Ambiente, Territorio e Infraestruturas, José Luis Díez, e o xefe da Axencia Galega de Infraestruturas en Pontevedra, Fausto Núñez.
Na xuntanza acordouse un plan de traballo unha vez que se decidiu o tramo no que se vai a actuar correspondente á parroquia Raxó desde a Avenida da Toxa, ata o límite co municipio de Sanxenxo.
Os técnicos da consellería mostraron os planos cos terreos de titularidade autonómica e outros que son de particulares cos que haberá que negociar.
Nas próximas semanas os técnicos procederan a marcar sobre o terreo con estacas toda a zona delimitando o ámbito que acollerán as beirarrúas proxectadas.
Este estaquillado ten un carácter informativo para que os veciños e os propietarios dos terreos privados que se vexan afectados teñan coñecemento da acción que se vai levar a cabo.
Na mesma reunión abordouse a construción dunha serie de pasos de peóns que de forma unánime foron solicitados polo Pleno da Corporación de Poio.
Cando os técnicos acudan para o estaquillado das futuras beirarrúas de Raxó tamén se achegarán ata outros puntos como Combarro, onde se pediu un paso de peóns.