A antiga ponte do tren sobre o Lérez estreou por fin a súa nova imaxe. Os operarios da empresa Elsamex concluíron as obras de recuperación e puxo en valor desta vía, que se converteu nun miradoiro peonil sobre o río.
"É unha mellora substancial para facela máis accesible e que a xente poida achegarse a ela", subliñou o alcalde de Pontevedra, Miguel Anxo Fernández Lores, que revisou este mércores o resultado deste proxecto, no que se investiron uns 185.000 euros.
Esta actuación, incluída a estratexia EDUSI financiada con fondos europeos, fora impulsada polo departamento municipal de Desenvolvemento Sostible e Medio Natural, que no pasado mandato dirixía o socialista Iván Puentes.
As obras permitiron que esta ponte, que levaba anos en desuso, sexa accesible desde a praia fluvial do Lérez e reforzar toda a súa seguridade para que funcione como miradoiro sobre os salóns do Lérez, o areal ou toda a Illa das Esculturas.
Para iso, apostouse por un tratamento de formigón sobre a ponte do ferrocarril, que substituíu á pedra que a vía tiña antes; cambiouse a varanda actual para facer unha máis segura e executouse unha dobre conexión da ribeira esquerda do río coa praia fluvial.
Esta última cuestión resolveuse cun itinerario accesible a través dunha senda en zigzag cun pavimento de formigón máis brando e unha escaleira de madeira que sobe directamente desde a zona na que se atopan a cafetería e os baños da praia fluvial.
Ademais, Elsamex realizou un axardinamento e tratamento con especies arbustivas de todo o noiro existente entre a cota da vía e a da avenida de Bos Aires, a iluminación de todo o ámbito e un tapiado provisional da boca do túnel que dá cara á parte de Lérez.
"A ponte pasa a formar parte dos espazos públicos de esparexemento e de sendeiros que hai ao redor do Lérez e conecta, dalgún xeito, coas sendas que van ata Bora. É un activo máis para a cidade", sentenciou ou rexedor.