O Concello de Marín publicou no Boletín Oficial da Provincia de Pontevedra a convocatoria de tres novas prazas de persoal administrativo, encadradas no subgrupo C1, que se cubrirán mediante o sistema de oposición.
Esta oferta de emprego público representa unha oportunidade para aquelas persoas que buscan estabilidade laboral na administración local.
Para participar no proceso selectivo, os aspirantes deberán cumprir varios requisitos básicos como ter nacionalidade española, ser maiores de 16 anos e estar en posesión do título de Bacharelato ou equivalente.
Ademais, requírese capacidade funcional para o desempeño das tarefas propias do posto e non ter sido separado do servizo de ningunha Administración pública mediante expediente disciplinario.
O prazo de presentación de solicitudes permanecerá aberto durante 20 días hábiles desde a publicación da resolución no BOPPO, rematando o luns 23 de xuño.
O Concello recomenda realizar este trámite preferentemente a través da sede electrónica municipal (sede.concellodemarin.es), onde as persoas interesadas poden acceder tanto ás bases completas da convocatoria como ao modelo de solicitude dende o Taboleiro de Anuncios.
O proceso selectivo estrutúrase en catro exercicios. O primeiro consistirá nun cuestionario tipo test que deberá realizarse nun tempo máximo de 100 minutos. No segundo, os aspirantes terán que responder a 25 preguntas curtas relacionadas co temario.
O terceiro exercicio será unha proba práctica sobre aspectos do temario que permitirá avaliar os coñecementos da materia. Por último, realizarase unha proba escrita para acreditar o nivel de coñecemento da lingua galega.