A conselleira de Vivenda e Planificación de Infraestruturas, María Martínez Allegue, fixo este venres unha visita á obra da senda entre Mollavao e Os Praceres que, despois de oito meses de traballo, leva o 12% de certificación en canto importe pero "vai en tempo".
As pasarelas que se van instalar son a parte máis custosa, polo que unha vez que estean colocadas se incrementará notablemente a certificación da obra, explicou a conselleira.
"Imos conforme ao cronograma fixado", tranquilizou Martínez Allegue, a expensas das autorizacións que ten que dar o ADIF e Costas do Estado que condicionan o ritmo dos traballos e tamén a apertura do aparcadoiro disuasorio construido que agarda por unha autorización da compañía correspondente para mudar a línea eléctrica.
Condicionada por esas autorizacións, a UTE formada polas empresas S0S y Oresa está a executar en catro treitos as obras de construción desta nova senda entre Mollavao e Os Praceres pola marxe dereita da estrada PO-546, que une Pontevedra con Marín, a coñecida como estrada vella a Marín.
A conselleira de Vivenda e Planificación de Infraestruturas recordou que esta actuación posibilitará habilitar un itinerario de 3,5 quilómetros de lonxitude, cun ancho que oscila entre os 2,5 e os 4 metros, que se complementará co aparcadoiro xa construido, un miradoiro e un parque infantil, entre outros equipamentos.
Os traballos contan cun prazo de execución de dezaoito meses e ao seu remate permitirán ir andando entre Pontevedra e Marín dunha maneira "totalmente segura".
Martínez Allegue recalcou que as obras prestarán especial coidado á seguridade e obrigarán a reducir a velocidade dos vehículos, grazas á glorieta que se construirá á altura do Centro de Investigacións Forestais de Lourizán.
Esta glorieta facilitará, ademais, o cambio de sentido dos vehículos que proceden de Marín e que queiran acceder ao aparcadoiro disuasorio.
Na obra incluirase a mellora tamén das paradas de transporte público, así como na renovación da iluminación do treito e a construción de dúas pasarelas, unha de máis de 120 metros sobre o rego de Louriñas e outra de 45 metros sobre O Sartán.
A conselleira destacou que esta actuación compleméntase coas obras xa executadas na mesma PO-546 tanto no treito urbano de Marín como en Estribela.
