Unha persoa resultou ferida este xoves nun aparatoso accidente de tráfico rexistrado na Autoestrada do Atlántico (AP-9) ao seu paso polo municipio de Caldas de Reis, un sinistro que provocou importantes retencións na vía.
Segundo informou o Centro Integrado de Atención ás Emerxencias 112 Galicia, o aviso do accidente recibiuse ás 15.46 horas. No sinistro víronse implicados un camión e unha furgoneta.
De acordo cos primeiros datos facilitados polas persoas que alertaron aos servizos de emerxencia, o camión atopábase detido cando a furgoneta, que sufriu danos de consideración, chocou contra el.
Como consecuencia do impacto, unha persoa resultou ferida, aínda que en principio as lesións son de carácter leve.
A central de emerxencias deu traslado do aviso á Garda Civil de Tráfico, a Urxencias Sanitarias, aos Bombeiros do Salnés, a Protección Civil e ao servizo de mantemento da autoestrada.
A ocupación de ambos os carrís durante os labores de atención e retirada dos vehículos provocou retencións na contorna do accidente, especialmente nas inmediacións da saída de Caldas de Reis.
Por outra banda, case á mesma hora rexistrouse un segundo accidente na AP-9, neste caso ao seu paso polo municipio de Vilaboa.
Segundo datos da Dirección Xeral de Tráfico (DXT), o sinistro ocasionou até dous quilómetros de retencións en sentido Pontevedra.
O accidente tivo lugar no punto quilométrico 147 da autoestrada, nas proximidades da ponte de Rande, onde un turismo se saíu da vía.
Atendendo á información facilitada polo 112 Galicia, non se rexistraron feridos neste segundo suceso.
Este último incidente produciuse menos de 24 horas despois de que a avaría dun tráiler dificultase a circulación na AP-9 en sentido Vigo, unha incidencia que se prolongou durante varias horas e afectou os carrís principais en dirección á cidade olívica.