A Xunta de Galicia pon en marcha este venres o nivel 3 de alerta, correspondente ao aviso vermello, ante a previsión de altas temperaturas na zona interior da provincia de Pontevedra.
Segundo os datos proporcionados por MeteoGalicia, a situación meteorolóxica está motivada pola posición das altas presións no norte da península Ibérica, que canalizan unha masa de aire cálido procedente do norte de África e favorecen ceos despexados, provocando un ascenso dos termómetros.
A alerta de nivel vermello estará vixente nos concellos pontevedreses de Agolada, O Campo Lameiro, A Caniza, Cerdedo Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.
Debido a esta circunstancia, a Secretaría Xeral para o Deporte determinou a suspensión de todas as actividades deportivas federadas e as correspondentes ao programa Xogade que estivesen programadas en espazos exteriores nestes municipios. Paralelamente, as áreas do noroeste e do interior da provincia da Coruña permanecerán baixo alerta de nivel laranxa.
As previsións indican que o venres e o sábado serán as xornadas coas condicións máis extremas deste episodio, con rexistros máximos que rebasarán os 35 graos en múltiples puntos da provincia pontevedresa.
Aínda que as temperaturas mínimas darán un tregua a vindeira madrugada, a transición cara ao sábado dará paso a unha noite tropical, na que os termómetros non descenderán dos 20 graos nalgunhas localidades.
O domingo prevese un descenso progresivo e lento dos valores térmicos.
A exposición prolongada a estas condicións climatolóxicas pode alterar a termorregulación do corpo humano, xerando deshidratación ou perdas de electrólitos. Entre os principais síntomas asociados atópanse os mareos, as cambras musculares, a fatiga e os golpes de calor.
PAUTAS DE PROTECCIÓN
A Consellería de Sanidade sinala como colectivos con maior vulnerabilidade ante as temperaturas elevadas aos menores de catro anos, especialmente os menores de doce meses, ás persoas maiores de 65 anos e a aqueles cidadáns que padecen patoloxías crónicas de carácter cardiovascular, renal, respiratorio ou neurodexenerativo, así como a pacientes baixo certos tratamentos farmacolóxicos.
Para minimizar os riscos, as autoridades sanitarias recomendan aplicar as seguintes medidas de prevención no ámbito doméstico e persoal:
-
Hidratación frecuente: Inxerir auga e zumes de froita frescos sen agardar a manifestar sensación de sede, evitando as bebidas con alto contido de azucre, alcohol ou cafeína.
-
Alimentación lixeira: Incrementar o consumo de ensaladas, verduras e froitas, distribuíndo as comidas en porcións menores ao longo do día.
-
Protección física: Utilizar roupa folgada de fibras naturais e cores claras, calzado transpirable, lentes de sol, gorros e cremas de protección solar.
-
Acondicionamento do fogar: Baixar as persianas e pechar as ventás nas horas diúrnas, aproveitando a noite para ventilar as estancias.
As recomendacións inclúen evitar as actividades físicas intensas nas horas centrais do día e non deixar a nenos nin a persoas maiores no interior de vehículos estacionados.
En caso de detectar síntomas de esgotamento ou sospeita de golpe de calor, débese contactar co servizo de emerxencias 061. Ata a chegada da asistencia, a persoa afectada debe ser trasladada a un lugar fresco e á sombra para arrefriar o seu corpo con auga e facilitarlle líquidos se permanece consciente.