O acordo urbanístico con Defensa da un novo paso coa cesión dun local ao Concello

A Xunta de Goberno local do Concello de Pontevedra deu luz verde este xoves á concesión da licenza de obra solicitada polo Instituto da Vivenda, Infraestrutura e Equipamento da Defensa (INVIED) para unificar tres inmobles situados no número 36 da avenida de María Victoria Moreno.

A actuación, cun investimento próximo aos 25.000 euros, permitirá adaptar estes espazos antes da súa futura cesión á Administración local, no marco do convenio urbanístico subscrito co Ministerio de Defensa.

O proxecto contempla a integración das tres antigas vivendas nun único local de 367 metros cadrados.

Na actualidade, os inmobles están separados e teñen acceso desde o relanzo da planta baixa do edificio.

A intervención permitirá transformalos nun espazo diáfano e con entrada directa desde a rúa, unha condición esixida polo Concello para facilitar o seu uso público sen interferir co acceso residencial do inmoble.

Esta actuación forma parte dun acordo urbanístico de maior alcance entre o Concello e Defensa, chamado a redefinir Campolongo e Mollavao.

No ámbito de Campolongo, entre a avenida de María Victoria Moreno e Xeneral Rubín, o convenio permitirá ao INVIED construír dous novos edificios con aparcadoiro soterrado privado, dando resposta á falta de estacionamento da contorna.

A operación urbanística traerá tamén importantes melloras para a cidade, coa creación de case 10.000 metros cadrados de novos espazos públicos, zonas verdes e viarios, ademais da prolongación da rúa Tablada ata María Victoria Moreno.

Mentres, en Mollavao, na confluencia de Manuel del Palacio con Rosalía de Castro, xa se completou o derrubo das antigas edificacións militares para habilitar unha nova praza pública de máis de 3.800 metros cadrados.

O convenio permitirá tamén a construción dun novo edificio que contribuirá a integrar urbanisticamente a zona e pechar a medianeira existente.

Ao tempo posibilitarase a conexión peonil entre este punto da Avenida de Rosalía de Castro con Manuel del Palacio.

Co avance destes proxectos, o Concello e o Ministerio de Defensa continúan desenvolvendo unha das operacións urbanísticas máis relevantes dos últimos anos en Pontevedra, orientada a recuperar espazos para o uso cidadán e mellorar a configuración urbana da cidade.