O Consello de Administración da sociedade estatal Aguas de las Cuencas de España (Acuaes) do Ministerio de Agricultura, Alimentación e Medio Ambiente (MAGRAMA) aprobou a adxudicación por 5,9 millóns de euros das obras de mellora do abastecemento da marxe esquerda da Ría de Pontevedra á empresa Rover Alcisa S.A.
As obras adxudicadas, que desenvolverán o tramo incluído entre os concellos de Pontevedra e Vilaboa, consisten na construción dunha condución que, partindo do depósito de regulación que se executará en Mourente, percorrerá o arco da marxe esquerda da ría, bordeando polo sur o Concello de Pontevedra ata Lourizán.
O proxecto inclúe tamén a execución dun ramal para o abastecemento de Vilaboa, no que se executarán dous depósitos reguladores cunha capacidade de almacenamento de 1.750 m3 cada un, que garantirán a subministración das puntas de demanda deste Concello.
Ademais, executaranse un total de 17 quilómetros de conducións, de fundición dúctil, de nova implantación, con diámetros que oscilan entre os 250 e os 600 mm.