A Asociación de Afectados por Inundacións Río Valdecorvos (AFIRVAL) reuniu o mércores 10 á veciñanza do barrio nunha asemblea pública celebrada no local parroquial da Igrexa da Virxe do Camiño. O encontro serviu para poñer enriba da mesa unha situación que cualifican de crítica polas inundacións reiteradas que sofre a zona e a falta de respostas coordinadas por parte das administracións.
Durante a xuntanza, AFIRVAL incidiu na urxencia dunha coordinación real entre a Xunta de Galicia —a través de Augas de Galicia— e o Concello de Pontevedra, xunto coa concesionaria Viaqua. Segundo denunciaron, ambas administracións están a actuar "de xeito paralelo e sen conexión", o que retrasa solucións clave. Mentres a Xunta analiza o proxecto das balsas de retención, o Concello mantén pendente a actuación no rebosadoiro de José Malvar á espera dese mesmo estudo.
A asociación tamén criticou a negativa municipal a estudar a retirada do colector ou a ampliación da galería no marco da obra de Casimiro Gómez. Para AFIRVAL, resulta imprescindible unha revisión integral do tramo soterrado do río Valdecorvos, onde sinalan a existencia de claros estreitamentos baixo o Colexio Atlántico e na rotonda da Ponte dos Tirantes.
Ao remate da asemblea, os veciños acordaron unha serie de reivindicacións concretas que consideran inaplazables. Entre elas, destaca a solicitude dunha reunión urxente co alcalde Miguel Anxo Fernández Lores, unha petición que xa fora presentada en 2024, poucos días antes da catástrofe provocada pola DANA en Valencia.
Tamén reclaman que a reforma do tramo soterrado do río en Casimiro Gómez teña carácter prioritario dentro das obras de humanización previstas para 2026.
Ademais, propoñen a implantación dun sistema de alertas preventivas nos teléfonos móbiles para avisar de episodios de fortes chuvias, así como un estudo sobre a cobertura dos danos materiais sufridos en vivendas e vehículos ao empregar unha zona residencial como área inundable.
No ámbito da mobilidade, os asistentes pediron unha maior regulación do aparcamento, con vixilancia de vehículos abandonados e a creación dunha tarxeta de estacionamento libre para situacións de emerxencia.
A asemblea pechouse cunha mensaxe unánime, que Valdecorvos non quere máis parches nin promesas, senón solucións definitivas que garantan a seguridade e a tranquilidade dun barrio cansado de vivir pendente do ceo.
