O barrio pontevedrés de Valdecorvos continúa a medrar. A conselleira de Vivenda e Planificación de Infraestruturas, María Martínez Allegue, anunciou este xoves a licitación das obras dun novo edificio de 48 vivendas públicas.
As empresas interesadas xa poden consultar na Plataforma de Contratos Públicos de Galicia onde poderán presentar as súas ofertas ata o 22 de decembro.
O orzamento previsto acada os 7,6 millóns de euros.
Nunha visita á parcela onde se vai construir este inmoble, a conselleira explicou aos xornalistas que o proxecto contempla un edificio "fermoso e funcional", de seis plantas, con garaxe e tamén varios locais comerciais porque "queremos que Valdecorvos non só teña novas vivendas, senón tamén máis vida e actividade", subliñou Allegue.
A titular de Vivenda avanzou ademais que antes de que remate o ano se adxudicarán as obras doutro bloque con 56 novas vivendas públicas, e que o próximo ano comezarán os traballos de ambos edificios. Tamén está prevista a entrega de 74 vivendas máis, cuxas obras avanzan a bo ritmo.
Con todos estes proxectos, Valdecorvos contará con 236 novas vivendas públicas, ás que se suman 53 en Tafisa e 11 nas Devesas, consolidando así o compromiso da Xunta con Pontevedra, como repetiu a conselleira.
Ademais, Allegue anunciou que o Goberno galego xa remitiu á Dirección Xeral de Calidade Ambiental o proxecto para iniciar o procedemento ambiental do Proxecto de Interese Autonómico (PIA) que permitirá desenvolver novo solo residencial en San Amaro.
En conxunto, a Xunta ten comprometido un investimento de 60 millóns de euros en novas vivendas públicas na cidade, dos cales 28,19 millóns están previstos para o vindeiro ano 2026.
A conselleira lembrou tamén que o Executivo autonómico traballa na Estratexia de Desenvolvemento de Solo, que prevé a construción doutras 2.000 vivendas máis en Pontevedra, impulsadas por promotores e cooperativas.
Mirando cara ao futuro, Allegue anunciou que o 1 de xaneiro entrarán en vigor novas medidas para incrementar a oferta de vivenda. Entre elas, destaca un aumento do 20% na edificabilidade para as promocións que destinen polo menos o 60% das vivendas a protección pública. Ademais, os concellos poderán promover Proxectos de Interese Autonómico con solo destinado nun 80% á vivenda protexida.
"Ogallá o vindeiro ano se poidan ver máis proxectos de nova vivenda nos solos dotacionais que hoxe están en estado de abandono ou desuso, o que permitirá incrementar a oferta de aloxamentos e revitalizar zonas degradadas na cidade", concluíu a conselleira.