Agardan que a borrasca Ingrid non afecte á Gala dos Premios Feroz

A cidade de Pontevedra amenceu este venres tras unha noite intensa de vento e choiva provocada polo paso da borrasca Ingrid. A pesar das inclemencias meteorolóxicas, a axenda cultural da cidade non se verá afectada.

A concelleira de Seguridade, Eva Vilaverde, confirmou esta mañá en rolda de prensa que a Gala dos Premios Feroz, prevista para este sábado 24 no Pazo da Cultura, celebrarase sen cambios nin incidencias nas súas infraestruturas.

Segundo informou a edil, a carpa instalada para acoller a alfombra vermella foi revisada e, ao estar reforzada, non sufriu ningún dano a pesar dos fortes refachos de vento.

A previsión meteorolóxica xoga a favor do evento cinematográfico: espérase que a forza do vento amaine de cara ao sábado, aínda que persistirán as choivas.

O dispositivo de seguridade arredor do Pazo mantense "atento pero sen medidas excepcionais", máis alá das restricións de aparcadoiro na zona debido á loxística de chegada de coches de convidados e á afluencia de público.

Máis aló do evento dos Feroz, Vilaverde fixo balance dunha noite complicada no meteorolóxico, pero na que a cidade demostrou "soportar bastante ben os temporais deste ano".

Aínda que o número de incidencias foi elevado debido á combinación de vento e auga, a concelleira cualificounas de "menores, sen maior repercusión nin gravidade".

Os servizos de emerxencia, incluíndo Bombeiros, Policía Local e as brigadas das empresas concesionarias, traballaron arreo cos efectivos habituais para solucionar os problemas que se foron sucedendo.

O incidente máis "vistoso", segundo a concelleira, foi a caída dun farol na rúa Gutiérrez Mellado, que xa foi reposto polos servizos técnicos.

Tamén se rexistraron movementos nalgúns contedores de lixo, aínda que se notou unha mellora na estabilidade grazas ao seu novo formato.

Os Bombeiros tiveron que intervir en Leandro do Río Carnota, preto do centro de saúde, debido ao risco de caída de tellas dun inmoble, o que obrigou a cortar o tráfico na zona.

Unha situación similar viviuse na Avenida de Montecelo, onde foron detectadas chapas en perigo de desprendemento, requerindo a presenza dos bombeiros.

Rexistráronse problemas co cableado na rúa Ramón Peña e caída de árbores ou ramas en Ernestina Otero, así como na zona del arco de acceso á fábrica de Malvar, onde un exemplar caeu sobre a vía pública.

Na rúa Luis Otero detectáronse pequenos restos de uralita, posiblemente desprendidos de naves colindantes. En Espincelo, preto do edificio da Xunta, houbo que retirar chapas desprendidas tamén.

O Concello mantén activos os protocolos de vixilancia. Pontevedra atópase en pre-emerxencia do plan Inungal para controlar o caudal do río Lérez e o perigo de desbordamento.

Segue vixente, durante este venres, a alerta amarela por vento nas Rías Baixas, aínda que a alerta vermella costeira en todo o litoral da provincia de Pontevedra non afecta directamente ao interior da ría.

"Teremos que seguir alerta e pendentes", subliñou Vilaverde, indicando que as brigadas de iluminación e os servizos de xardinería continúan revisando as zonas de arborado e atendendo posibles avisos cidadáns.

Os servizos municipais tampouco teñen constancia de danos en centros educativos nin en instalacións deportivas.