A Alameda estala de alegría: así celebrou Pontevedra o Mundial de España

Centos de persoas abarrotaron a Alameda de Pontevedra para ver xuntos a final do Mundial que este domingo enfrontou ás seleccións de España e Arxentina.

Desde horas antes do inicio do encontro, os máis previsores xa comezaron a ocupar as primeiras filas diante das dúas pantallas instaladas pola Deputación de Pontevedra.

Esta dobre pantalla, unha decisión de última hora, permitiu que os problemas de visibilidade que houbo no choque de semifinais contra Francia foran historia.

A iso contribuíron ademais outras medidas como elevar a pantalla e cambiar a orientación para salvar os obstáculos que poderían dificultar a visión do partido.

Os asistentes mantiveron a tensión durante todo o encontro e os nervios fixéronse palpables a medida que pasaban os minutos sen goles no partido.

A vermella a Enzo Fernández, que deixaba a Arxentina cun menos, foi moi celebrada. E xa na prórroga, un gol de Nico Williams desataba a euforia. Durou pouco porque o árbitro anulou o tanto ao pitar unha falta previa de Mikel Merino.

Neste período de prolongación chegaron, sen dúbida, algunhas das ocasións de gol máis claras para España, o que aumentou a emoción e a desesperación dos afeccionados.

E no arranque da segunda parte da prórroga, no minuto 106 do partido, chegou o gol máis esperado por todos. O que vale a segunda estrela. Ferrán Torres facía historia dándolle un novo Mundial á selección española.

Centraba Pedro Porro ao segundo pau, Nico Williams poñíaa atrás de cabeza e o heroe de Nova York, coa zurda, cravábaa arriba superando ao, até entón, inexpugnable Dibu Martínez.

A partir de aí, a festa na Alameda foi xa imparable. Os ecos resoaron por toda a cidade. O berro dos pontevedreses desde as súas casas e desde os bares foi unánime.

E as celebracións, como marca a tradición, duraron até altas horas da madrugada.