As deficiencias que presenta o centro de saúde da Lama levaron ao alcalde, David Carrera, e ao tenente de alcalde José Fuertes, a reclamar ao xerente da área Sanitaria de Pontevedra-O Salnés, José Flores, unha "solución global" consistente no cambio total da cuberta e unha mellor redistribución dos espazos interiores.
Esta reunión técnica celebrouse este venres previamente á audiencia que lle concederá "en breve" o conselleiro de Sanidade, Antonio Gómez Caamaño, onde tratarán este tema en profundidade para así adoptar as medidas necesarias.
Segundo manifestou o alcalde, estas melloras "deberían ir orientadas a unha reforma integral do centro de saúde ou a construción dun novo".
Considera que o ambulatorio está situado nun lugar céntrico, conta cun aparcadoiro amplo e está conectado con todo tipo de servizos.
Con todo, insiste na necesidade de valorar cos técnicos "a mellor solución para que a veciñanza estea atendido o mellor posible".
Durante a reunión, Carreira mostrou a Flores e aos membros do seu equipo as deficiencias existentes e propuxo as solucións técnicas que expoñen desde o Concello.
Entre elas atópase a necesidade de implantar o cambio total da cuberta para resolver os problemas de humidades e deficiencias de aforro enerxético e calefacción, así como redistribuír os espazos do inmoble de forma máis apropiada coas necesidades e os servizos que se prestan no centro de saúde que permitirían modernizalo desde un punto de vista operativo e de eficiencia.
Desde a xerencia da área comprometéronse a analizar as propostas e valorar economicamente o investimento co fin de ser afrontadas da forma máis idónea dentro dos procedementos administrativos e orzamentarios que manexa a Consellería de Sanidade e a propia Xunta de Galicia para afrontar este tipo de accións.
Ademais, os responsables do Sergas aproveitaron a visita para comprobar o funcionamento, a atención sanitaria aos usuarios e o nivel organizativo dos servizos que se prestan.
Pola súa banda, David Carrera, valorou "moi positivamente" esta reunión técnica e manifestou que "creo que estamos no bo camiño para dar unha solución integral a este centro, que necesita un investimento importante e unha implicación total por parte da administración autonómica e do local".