O servizo público postal que presta Correos vive, segundo CC OO, unha "complicada situación" nos municipos de Meis e Ribadumia.
O sindicato reuniuse a pasada semana cos alcaldes de ambos os concellos para informalos desta situación, que considera que está marcada por unha "notable redución de persoal" e unha "deterioración progresiva" do servizo.
Segundo denuncian, en cada un destes concellos operan tan só dous carteiros/as, o 50 por cento de efectivos que, de forma normal, deberían asumir a repartición diaria.
CC OO denunca que esta circunstancia se agrava tendo en conta que, deses dous carteiros asignados a cada concello, un deles debe dedicar dúas horas da súa xornada á atención ao público nas oficinas rurais de Barrantes e Mosteiro, o que "limita aínda máis o tempo dispoñible para cubrir as súas rutas de repartición".
O sindicato denuncia que esta realidade é "consecuencia directa" da política continuada de recortes en Correos, que "mantén sen cubrir baixas, vacacións, desprazamentos ou outras ausencias do persoal".
Esta "falta de contratación", segundo CC OO, obriga ao persoal actual a asumir de maneira permanente o traballo de compañeiros ausentes, xerando un "incremento insosteible da presión laboral".
O sindicato advirte que esta sobrecarga está "a afectar de forma grave á saúde física e psicolóxica" dos traballadores e traballadoras, e repercutindo de maneira directa na cidadanía.
Así, asegura que "cada vez son máis frecuentes" os atrasos na entrega de correspondencia esencial como citas médicas, recibos que terminan chegando fóra de prazo ou notificacións oficiais, o que supón un "prexuízo que a poboación non debería asumir".
