O presidente da Xunta de Galicia, Alfonso Rueda, puxo metaforicamente as lentes de Alfonso Daniel Rodríguez Castelao para despedir o ano con todos os galegos e galegas.
Este 2025, elixiu o Museo de Pontevedra para a súa tradicional mensaxe de fin de ano, ao ser a institución de referencia para coñecer a obra desta figura crave da cultura e política galega.
O Museo de Pontevedra custodia máis de 1.800 pezas do legado do debuxante, dramaturgo, ensaísta e político galeguista e Rueda utilizouno como escenario para lembrar que 2025 foi declarado Ano Castelao para conmemorar o 75 aniversario da súa morte.
Como despedida a un 2025 "frenético e intenso", o presidente autonómico apelou á figura de Castelao para "reflexionar con serenidade sobre os retos que afronta Galicia" e sostivo que algunhas das ideas que el defendeu, e que entón eran revolucionarias, "hoxe forman parte do acervo común das galegas e galegos".
"A arquitectura institucional, política e cultural da Galicia de hoxe é posible porque antes a soñaron Castelao, Risco, Brañas, Otero Pedrayo e outros moitos intelectuais que amaban o seu país", reivindicou Rueda.
O presidente sostén que moitas das inxustizas que sufría Galicia e que denunciou Castelao "son, afortunadamente xa, un mal recordo do pasado", pero, para combater os agravios que aínda existen, defende que Galicia dispón das súas propias institucións, "fortes e cribles, que garanten que a nosa voz nunca xamais volva ser ignorada".
Na Galicia de 2025, o presidente detívose nas redes sociais, que "marcan o compás do mundo", e provocan que, ás veces, só miremos o universo a través dunha pantalla. Fronte a esta realidade, defende esta comunidade como "un refuxio no que as cousas se entendan doutra maneira, un lugar no que seguir mirando aos ollos das persoas".
Tivo especial recordo aos incendios de enorme virulencia que arrasaron España o pasado verán, e que tamén queimaron Galicia e "provocaron momentos de impotencia".
Defende nesa crise a xestión do goberno galego para que ningún dos afectados quedase sen axuda e defende a necesidade do traballo conxunto para ter un monte máis produtivo e máis protexido.
Galicia, defendeu Rueda, "non se pon límites nin teito" e apostou por unha comunidade na que a vivenda "non sexa un ben de luxo, senón unha condición indispensable para que cada un poida construír a súa propia vida". Aproveitou para anunciar que en 2026 estarán en marcha 4.000 novas vivendas públicas.
Esa Galicia do futuro que visualiza Rueda está unida a unha posta pola investigación e a innovación, "que son os alicerces dun crecemento robusto", e tamén aos produtos galegos, en cuxa defensa avanza que seguirán alzando a voz, en todos os foros, contra o proteccionismo comercial que "pecha portas inxustamente e castiga a quen o fai ben".
A educación xoga tamén un papel fundamental, "a ferramenta máis poderosa para garantir o avance do país".
Presumiu de que a comunidade é líder na regulación das pantallas no campo educativo e na prohibición do consumo de bebidas enerxéticas a menores e do traballo contra o acoso escolar e prometeu que non escatimará recursos "para que as e os máis novos accedan a unha formación de excelencia, pública e gratuíta".
O sistema sistema sanitario público tamén se coou na mensaxe de fin de ano do presidente, que defendeu que ofrece "o calendario vacunal máis completo do mundo", amplos programas de cribado e tratamentos punteiros na loita contra o cancro que eran impensables hai poucos anos. Prometeu que "seguir avanzando nesta senda é unha obrigación irrenunciable".
Tamén sacou peito de que Galicia empezará 2026 coa entrada en vigor os orzamentos da Xunta, "como debe ser", pois, en alusión velada ao goberno central, defendeu que "os Gobernos están para gobernar, non para entreter e moito menos para indignar".