O Concello do Grove e a Fundación Amigos de Galicia acaban de renovar o convenio de colaboración que lles permite axudar ás familias do municipio en situación de necesidade.
O alcalde do Grove, José Antonio Cacabelos, e o director da fundación, Jesús Busto, renovaron este mércores o convenio, que se enmarca no Plan Integral pola Integración Social e contra a Exclusión, con atención prioritaria á infancia.
A Fundación Amigos de Galicia atende ás familias do municipio que teñen graves carencias económicas e cobre as súas necesidades básicas coa repartición de alimentos, roupa ou material escolar. Cada mes, cada unha destas familias, recibe un paquete con produtos básicos de primeira necesidade e produtos frescos como iogures, verduras ou froitas. Tamén reciben produtos de hixiene e limpeza do fogar e vestimenta.
Desde xaneiro do 2016 ata novembro, a Fundación Amigos de Galicia, en colaboración cos servizos sociais do municipio, atendeu unha media de 26 familias ao mes, o que implica unha media de 52 adultos e 31 menores. A entidade repartiu entre xaneiro e outubro axuda por valor de 59.267,51 euros.