As policías locais de Poio e Pontevedra e a Garda Civil manteñen en marcha un amplo operativo de procura para localizar a un home "moi perigoso" que foxe nun coche roubado e sen ter carné de conducir.
A persecución comezou en Poio pasadas as 12.30 horas de deste mércores e estendeuse aos arredores unha vez que perderon o rastro ao condutor.
A Policía Local de Poio comezou a persecución ao ver a esta persoa que circulaba cun vehículo roubado fai un par de semanas na zona de Porteliña.
Déronlle alto, pero negouse a parar e iniciouse unha persecución cara á zona de Fragamoreira. De aí foi cara a Campañó e a zona da Ponte das Cabras, xa en Pontevedra. Neste punto meteuse pola zona de terra, percorrida habitualmente por peregrinos.
Desde a Policía Local de Poio indican que se trata de "unha persoa moi perigosa con antecedentes de todo tipo" e xa lle consta unha detención por condución temeraria en Poio hai uns anos.
Nesta ocasión, nesa zona de Pontevedra xerouse "perigo con temeridade manifesta para os peregrinos" e tamén para varias persoas, pois este condutor asumiu unha condución a altísima de velocidade.
Finalmente, escapouse da patrulla pola elevada velocidade á que circulaba e o perigo que existía coa presenza de peregrinos na vía.
A Policía Local teno xa identificado e é veciño de Poio.
No coche ía este home como condutor e unha muller como acompañante.
Están a tramitarse dilixencias policiais por condución temeraria mentres o amplo dispositivo policial tenta localizarlle, pero segue fugado.