Ana Pontón pon a Pontevedra como exemplo do modelo forestal alternativo que defende o BNG

A portavoz nacional do Bloque Nacionalista Galego (BNG), Ana Pontón, visitou este venres o parque forestal da Tomba, en Pontevedra, acompañada polo alcalde, Miguel Anxo Fernández Lores, e varios membros do goberno local.

Durante o percorrido, Pontón instou o presidente da Xunta, Alfonso Rueda a aceptar a creación dunha comisión de investigación parlamentaria para esclarecer a xestión dos incendios forestais que arrasaron Galicia este verán.

A líder nacionalista denunciou o modelo forestal impulsado polo Partido Popular, ao que acusou de "abandonar o medio rural" e de favorecer a eucaliptización "ao servizo de macrocelulosas contaminantes" e "convertendo os nosos montes nunha polvoreira ao servizo de proxectos como pode ser ENCE ou o que agora queren facer con ALTRI", en lugar de protexer os montes galegos.

Pontón puxo como exemplo de alternativa o programa municipal Monte Vivo, desenvolvido polo Concello de Pontevedra, que aposta pola recuperación de especies autóctonas e a colaboración con comunidades de montes para unha ordenación forestal sostible.

"Outra política forestal é posible", afirmou, e asegurou que este tipo de iniciativas permiten unha mellor prevención fronte aos incendios, á vez que conservan o medio ambiente e xeran riqueza local.

Durante a súa intervención, Pontón criticou duramente a actuación da Xunta durante a última vaga de incendios, que deixou máis de 140.000 hectáreas calcinadas, miles de persoas desaloxadas e graves danos á actividade agraria e forestal.

Pontón quere que esa comisión de investigación "sirva para que os erros que se cometeron e que nos levaron até aquí non se volvan a repetir no futuro" e porque os galegos "merecen explicacións" sobre por que non se actuou a tempo, por que non había medios suficientes ou "por que mentres ardía Galicia, o presidente da Xunta estaba nunha praza de touros".

A portavoz do BNG reclamou responsabilidades políticas e urxiu a tomar medidas estruturais para frear a deterioración do dispositivo de prevención e extinción de incendios. Neste sentido, denunciou que "hoxe hai menos medios que fai 16 anos, a pesar de que as condicións climáticas son moito máis adversas".

Pontón tamén lembrou que os incendios non son inevitables e que existen alternativas viables, como a desenvolvida en Pontevedra, aínda que advertiu que estas competencias corresponden á Xunta.

Con todo, destacou o esforzo do goberno local pontevedrés como "un exemplo de responsabilidade institucional" ante o que considera "o principal problema ambiental de Galicia".

Por último, fixo un chamamento ao investimento en prevención, subliñando que "cada euro investido en prevención aforra dez en extinción", e volveu insistir na necesidade dun cambio de rumbo na política forestal galega.

"Queremos transparencia, queremos que se coñeza a verdade e, sobre todo, queremos que estes incendios marquen un punto de inflexión para acabar con décadas de abandono do rural", concluíu.

Pola súa banda, Miguel Anxo Fernández Lores reivindicou o compromiso do Concello coa recuperación e xestión do monte, durante unha visita ao parque forestal da Tomba, un espazo de 80 hectáreas creado en colaboración coa comunidade de montes de Campañó.

Lores lembrou que este parque forma parte do plan Monte Vivo, iniciado en 2007 tras os graves incendios de 2006, que arrasaron máis de 4.000 hectáreas no municipio. Desde entón, o Concello investiu na reforestación con especies autóctonas -plantando máis de 400.000 árbores- e a eliminación de especies invasoras, a pesar de que a xestión forestal non é competencia municipal.

O alcalde subliñou que os incendios forestais son "o principal problema ambiental de Galicia", onde o 75% do territorio é monte, unha realidade que tamén afecta a Pontevedra. Neste contexto, defendeu a creación de parques forestais como A Fracha, O Pontillón do Castro e A Tomba, cun investimento anual de 120.000 euros en mantemento.

"O monte é futuro, é vida", afirmou Lores, quen apelou á Xunta a asumir a súa responsabilidade e deseñar un plan forestal estrutural para toda Galicia.