Foi unha decisión difícil pola cantidade e calidade dos candidatos que se presentaron para obter o Premio Cidade de Pontevedra 2016. Así expresaba a presidenta da comisión de Cultura, Carmen Fouces, á saída da reunión do xurado as dificultades que se atoparon para tomar unha decisión sobre quen debía levar os premios nesta edición.
Finalmente, o xurado decidiu que Ángela Paz se fixera, co apoio unánime, co premio ás persoas físicas mentres que o Colexio de Avogados de Pontevedra levase o de persoa xurídica.
Ángela Paz García, segundo Carmen Fouces, obtivo o premio por ser unha activista social e dinámica, que leva moitos anos no movemento social e que, a pesar de sufrir unha enfermidade crónica, decidiu crear un colectivo como a Asociación Socio Sanitaria Educativa Inflamatoria Intestinal (ASSEII), que recolle os intereses polo traballo social e polas necesidades que teñen os enfermos.
Ademais logrou desenvolver iniciativas vangardistas como a de lograr acordos para aparcar en carga e descarga para que as persoas con estas doenzas poidan realizar as súas necesidades e utilizar os servizos de cafeterías sen necesidade de consumir.
Fouces destacou tamén o labor que desempeñaron Lourdes Domínguez, Antón Sobral e Verísimo Pazos, polos seus logros deportivos, artísticos e como líder do movemento veciñal.
Pola súa banda, o Ilustre Colexio de Avogados de Pontevedra lograba o premio de persoas xurídicas por propoñer un convenio que garante a atención gratuíta a persoas en perigo de desafiuzamento, a pesar de que deixaron de cobrar polos seus servizos profesionais nestes casos.
Ese acordo co Concello de Pontevedra foi pioneiro e serviu como referente para que a Xunta de Galicia asinase outro similar para toda a comunidade. "Ten un plus comparativamente con outros candidatos porque non adican o seu tempo libre, senón o seu traballo", afirmou Fouces.
O Colexio de Avogados obtivo o apoio de todos os membros do xurado, salvo unha abstención.
A presidenta da comisión destacou tamén o traballo que desempeñan o resto de candidatos: Difusión Felina, Asociación Boa Vida, Solidariedade Internacional, Amigos da Pontevedrada e HQR.
Os premios serán entregados nun pleno que se desenvolverá o 20 de xaneiro, coincidindo co día de San Sebastián, patrón da cidade.