Vaipolorío, o colectivo ecoloxista que traballa na limpeza do Gafos, manifestaba días atrás ante a primeira borrasca de 2026 en Pontevedra con esta frase "para que o ano sexa bo, o río ten que botar sete veces fóra". E nesas están os ríos de Pontevedra ante o paso da borrasca Joseph.
Esta tromba de auga e vento está a golpear con forza o municipio este luns, 26 de xaneiro, poñendo en xaque as infraestruturas e os servizos de emerxencia.
Ante a activación da alerta vermella por precipitacións intensas no interior da provincia e a situación crítica na conca do río Lérez, a Dirección Xeral de Seguridade do Concello tomou medidas drásticas para garantir a seguridade cidadá.
A concelleira de Seguridade, Eva Vilaverde, confirmou que se decretou o peche durante a tarde deste luns de diversos espazos situados en zonas inundables. As instalacións afectadas son os campos do CMF Manolo Barreiro, o Pavillón Multiusos da Xunqueira, os pavillóns dos CP Xunqueira 1 e 2. e o campo de fútbol de Ponte Sampaio.
Vilaverde suliñou que todos os servizos municipais e equipos de emerxencia permanecen en alerta permanente para intervir ante calquera incidencia ou urxencia derivada das fortes chuvias.
A situación hidrolóxica comeza a complicarse. Na parroquia de Xeve, residentes xa informaron do desbordamento do río Fontáns, mentres que os principais cauces da comarca vixíanse con preocupación.
Tamén o río Gafos cubría durante a tarde a zona do paseo debido a unha nova enchente.
E o Concello de Pontevedra informaba de que a Policía Local tiña que pechar o Camiño de Santiago ao paso pola Gándara por desbordamento do río Rons.
Tamén informaba do derrubamento dun muro de propiedade particular no lugar dos Fontáns na parroquia de Santa María de Xeve.
A zona permanece sinalizada e os propietarios foron avisados para que se repoña a vía en canto sexa posible. A veciñanza pode acceder ás vivendas por unha vía alternativa, según indica o Concello.
Prevese que se superen os 120 l/m² en apenas 12 horas, podendo acadar os 150 l/m² ao final da xornada.
Tamén volvía inundarse a Rúa do Santo, na parroquia de Lourizán, un punto crítico cada vez que chove con persistencia.
Ao mediodía colapsaban as canalizacións e, co paso das horas, a auga creou unha balsa de lodo nos accesos ás vivendas dificultando a entrada e saída dos residentes.
A inestabilidade non remitirá nas vindeiras horas. Meteogalicia advirte de que as precipitacións seguirán sendo persistentes e intensas durante o que resta de luns, facéndose máis activas co avance da tarde.
Coa entrada de aire frío pola noite, agárdanse chuvascos tormentosos que poderían vir acompañados de sarabia e refachos de vento moi fortes do suroeste.
Para mañá, martes 27 de xaneiro, a situación continuará a ser complicada pola formación dunha nova borrasca ao noroeste. O prognóstico indica chuvascos tormentosos con posibilidade de sarabia, con descenso térmico deixando temperaturas entre 5 e 12 graos.
Tamén baixará a cota de neve ata situarse entre os 500 e 800 metros e o vento será moderado con intervalos fortes no litoral.
As autoridades recomendan á poboación extremar as precaucións, evitar achegarse ás canles dos ríos e ao mar, ademais de reducir os desprazamentos innecesarios mentres dure esta situación.