O entroido achégase e Pontevedra, aínda que timidamente, empeza a contaxiarse desta especial celebración.
Aínda que o Rei Urco non inaugurará oficialmente o Entroido 2014 ata o próximo 28 de febreiro, as rúas da cidade recibiron a visita este domingo dos 'Xenerais da Ulla' (Merza) dentro da tradicional representación dos diferentes carnavais de Galicia.
Os xenerais e correos a cabalo, característicos desta Festa de Interese Turístico de Galicia, paseáronse por Pontevedra acompañados de abandeirados, coros e comparsas como preludio ao que está por chegar.
A próxima semana, concretamente o sábado 22, será a quenda das Madamas e Galáns de Cobres.