O portavoz do grupo municipal do Partido Popular de Ponte Caldelas, Antón Xil non volverá liderar a candidatura á Alcaldía nos comicios de 2027. Así llo comunicou á Dirección provincial da formación conservadora.
Tras dous mandatos á fronte do grupo na oposición e a piques de cumprir 60 anos, Antón Xil considera que é o momento de facilitar unha "transición ordenada" cara a un proxecto renovado.
Segundo explica o PP nun comunicado, a decisión responde a unha reflexión persoal e política, e abre a porta a que un novo candidato ou candidata achegue "novas ideas, enerxía e propostas" para mellorar a vida dos veciños do municipio.
O PP anunciou que iniciará un "proceso de escoita" con militantes, simpatizantes e cidadanía co obxectivo de presentar unha "nova alternativa sólida, renovada e con garantías" fronte ao actual goberno do alcalde socialista Andrés Díaz, "baseada na participación, na proximidade e na construción dun proxecto ilusionante para o futuro do concello".
A pesar da retirada de Xil como candidato, o grupo municipal seguirá desempeñando o seu labor até o final do mandato, "mantendo unha oposición responsable e construtiva, centrada en defender os intereses da localidade".
Desde o PP quixeron agradecer publicamente a Antón Xil e ao conxunto do grupo municipal o seu compromiso, dedicación e traballo ao servizo da cidadanía.