A psicóloga Cristina Fariñas desenvolveu unha charla-obradoiro na Casa da Luz dentro do Programa APEGO, que busca a socialización en lingua galega a través de establecer vínculos entre os menores e a familia, asentando o arraigamento a Galicia. Este programa promovido polo equipo municipal de Normalización Lingüística en Pontevedra busca adaptarse ás necesidades das nais e dos pais que asisten a estas actividades.
Durante a tarde deste venres, Cristina Fariñas creou un espazo para que as familias con menores de seis anos compartisen inquedanzas, dúbidas e ideas para resolver situacións habituais nos comportamentos das crianzas.
A psicóloga ofreceulles asesoramento coa intención de que se busque unha contorna de felicidade na que se atopen a gusto.
Mentres os adultos atendían ás explicacións, os nenos entretíñanse lendo contos ou tomando a merenda, nun ambiente de xogos.